Toe ek as kind die eerste keer die Engelse woord “nonagenarian” gehoor het, het ek gedink dit het iets te make met “non age”. Engels is soos skaars soos reën in die verre suide van Namibië waar ek grootgeword het. Lag maar in jou mou… Ek het dus gedink dit is iemand wat só oud is dat sy ouderdom “non age” is… nie meer getel kan word nie. Die meter (“teller”) van die motor wat rekord hou van die kilometers het “oorgeslaan” en kan nie meer “tel” nie! Baie later, met die blootstelling aan klassieke tale, het ek agtergekom dié woord kom van die Latynse woord nōnāgēnārius ‎(“van die getal negentig”‎). Dit is dus iemand wie se jare in die negentigs is.
Oom Gerald Erickson, langslewende kinderhuiskind van Kestell Kinderhuis, het op Sondag 28 Januarie, sy 90ste verjaardag gevier.
In vorige uitgawes het ek vertel van oom Gerald Erickson wat by die sinodale sentrum (spesifiek Oornaghuis) bly. Oom Gerald het vanaf 1932, toe hy 4 jaar oud was, vir 11 jaar in die Kestell Kinderhuis van die NG Kerk gebly. Die afgelope 16 jaar bly hy weer by die sinodale sentrum (op die terrein van die destydse Kestell Kinderhuis). Hy stap nog 2 keer ’n dag met sy “driewiel loopraam” na Checkers (±2 km heen en weer) om onder andere brood te koop wat hy vir die voëls by die sinodale sentrum voer.
Vrydag het ek by oom Gerald gaan kuier. Ek kry hom waar hy by sy “transistortjie” sit en na die gelukwense van verjaarsdag luister. Hy praat kliphard met die radio toe ’n tannie van oor die honderd gelukgewens word. “Wag maar, ek gaan ook nog so oud word”. Toe hy my sien, sê hy half verleë: “Ds. Mossie ek praat maar só. Ook met die Here. Iemand vra anderdag of die Here dan terugpraat. Ek het geantwoord, natuurlik. Ek hoor Hom in my kop en my hart. Ek praat maar só dominee… ook as ek loop”.
Oom Gerald, die sinodale sentrum se “non age” is ’n sprekende voorbeeld van die uitdrukking carpe diem… gryp (pluk) die dag.
Jean Calder het gesê: “Die lewe is ’n geskenk, ’n heilige reis wat ons almal onderneem. Ons moet daarom ons beste daaraan gee. En dit voluit leef.”