Vroeëkindontwikkeling Sentrums
(VKO)
Caritas Gemeenskapsfokus het 13 Vroeëkindontwikkeling Sentrums in die Noord-Kaap en Noord-Wes provinsies. Die sentrums is in die armste, agtergeblewe en mees afgeleë gebiede. Caritas Gemeenskapsfokus help die kinders om op kognitiewe, emosionele en sosiale vlakke te ontwikkel. Die AmazingBrainz-program wat deur ’n neuro-wetenskaplike, dr. Etienne van der Walt ontwikkel is, en die Caritas kinderland akademie leerprogram, voorsien aan hierdie behoefte.
Met sy visie, naamlik “die heling van die mens in sy gemeenskap”, streef Caritas Gemeenskapsfokus om verandering te bring in die lewens van kinders deur dienste van ’n hoë gehalte in Vroeëkindontwikkeling Sentrums te bied. Caritas Gemeenskapsfokus glo dat die ontwikkeling van die kind nie net gegrond is op motoriese-, kognitiewe-, perseptuele- en sosiale stimulering om leerkapasiteit te ontwikkel nie, maar dat die emosionele behoeftes van die kind ook aangespreek moet word. Terapeutiese dienste word ook aangebied om te help met die kinders se heling. Aangesien die ouers van hierdie kinders net so ’n groot rol in holistiese ontwikkeling speel, moet ook hulle ontwikkel, opgelei en vrygemaak word van probleme soos alkoholisme, armoede en ouerskapsonvermoë. Ouerleidingsprogramme word deurlopend aangebied om ouers te bemagtig in hul ouerskapvaardighede.
Caritas Gemeenskapsfokus beskik oor die dienste van ’n vaardige en toegewyde programbestuuder vir gemeenskapsontwikkeling asook ’n fasiliteerder en toesighouer vir die Vroeë Kindontwikkeling Sentrums (VKO’s). Die toesighouer moniteer die leerprogramme en spyskaarte van die sentrums. Sy is opgelei in die AmazingBrainz-program asook die Caritas kinderland akademie leerprogram en doen opleiding en praktykleiding.
Vroeëkindontwikkeling Sentrums (VKO) wat gevestig is en funksioneer:
- Blommeland in Strydenburg
- Kagisho in Jan Kempdorp
- Sonstraaltjie in Marchand
- Tjokkershoop in Hopetown
- Ratangthuto in Stella
- Haasdas in Augrabies
- Karoo Druppels in Britstown
- Voetspore van hoop in Griekwastad
- Haasbekkies in Vryburg
- Zimbi in Niekerkshoop
- Renosterberg in Petrusville
- Kaalvoet akademie in Phillipstown
- Lesedi in Vergelegen
Programbestuurder: Caritas Gemeenskapsontwikkeling
Me. Judith Evans
Fisiese adres:
Lawsonstraat 72
Kimberley
Kantoor-ure:
Maandag tot Vrydag vanaf 08h00 tot 16h30
Kontakbesonderhede:
Telefoon 087 150 5041/3
E-Pos [email protected] of [email protected]